Verso 1

śrī-bhagavān uvāca

vanaṁ vivikṣuḥ putreṣu

bhāryāṁ nyasya sahaiva vā

vana eva vasec chāntas

tṛtīyaṁ bhāgam āyuṣaḥ

Verso 2

kanda-mūla-phalair vanyair

medhyair vṛttiṁ prakalpayet

vasīta valkalaṁ vāsas

tṛṇa-parṇājināni vā

Verso 3

keśa-roma-nakha-śmaśru-

malāni bibhṛyād dataḥ

na dhāved apsu majjeta

tri kālaṁ sthaṇḍile-śayaḥ

Verso 4

grīṣme tapyeta pañcāgnīn

varṣāsv āsāra-ṣāḍ jale

ākaṇtha-magnaḥ śiśira

evaṁ vṛttas tapaś caret

Verso 5

agni-pakvaṁ samaśnīyāt

kāla-pakvam athāpi vā

ulūkhalāśma-kuṭṭo vā

dantolūkhala eva vā

Verso 6

svayaṁ sañcinuyāt sarvam

ātmano vṛtti-kāraṇam

deśa-kāla-balābhijño

nādadītānyadāhṛtam

Verso 7

vanyaiś caru-puroḍāśair

nirvapet kāla-coditān

na tu śrautena paśunā

māṁ yajeta vanāśramī

Verso 8

agnihotraṁ ca darśaś ca

paurṇamāsaś ca pūrva-vat

cāturmāsyāni ca muner

āmnātāni ca naigamaiḥ 

Verso 9

evaṁ cīrṇena tapasā

munir dhamani-santataḥ

māṁ tapo-mayam ārādhya

ṛṣi-lokād upaiti mām

Verso 10

yas tv etat kṛcchrataś cīrṇaṁ

tapo niḥśreyasaṁ mahat

kāmāyālpīyase yuñjyād

bāliśaḥ ko ’paras tataḥ

Verso 11

yadāsau niyame ’kalpo

jarayā jāta-vepathuḥ

ātmany agnīn samāropya

mac-citto ’gniṁ samāviśet

Verso 12

yadā karma-vipākeṣu

lokeṣu nirayātmasu

virāgo jāyate samyaṅ

nyastāgniḥ pravrajet tataḥ

Verso 13

iṣṭvā yathopadeśaṁ māṁ

dattvā sarva-svam ṛtvije

agnīn sva-prāṇa āveśya

nirapekṣaḥ parivrajet

Verso 14

viprasya vai sannyasato

devā dārādi-rūpiṇaḥ

vighnān kurvanty ayaṁ hy asmān

ākramya samiyāt param

Verso 15

bibhṛyāc cen munir vāsaḥ

kaupīnācchādanaṁ param

tyaktaṁ na daṇḍa-pātrābhyām

anyat kiñcid anāpadi

Verso 16

dṛṣṭi-pūtaṁ nyaset pādaṁ

vastra-pūtaṁ pibej jalam

satya-pūtāṁ vaded vācaṁ

manaḥ-pūtaṁ samācaret

Verso 17

maunānīhānilāyāmā

daṇḍā vāg-deha-cetasām

na hy ete yasya santy aṅga

veṇubhir na bhaved yatiḥ

Verso 18

bhikṣāṁ caturṣu varṇeṣu

vigarhyān varjayaṁś caret

saptāgārān asaṅkḷptāṁs

tuṣyel labdhena tāvatā

Verso 19

bahir jalāśayaṁ gatvā

tatropaspṛśya vāg-yataḥ

vibhajya pāvitaṁ śeṣaṁ

bhuñjītāśeṣam āhṛtam

Verso 20

ekaś caren mahīm etāṁ

niḥsaṅgaḥ saṁyatendriyaḥ

ātma-krīḍa ātma-rata

ātma-vān sama-darśanaḥ

Verso 21

vivikta-kṣema-śaraṇo

mad-bhāva-vimalāśayaḥ

ātmānaṁ cintayed ekam

abhedena mayā muniḥ

Verso 22

anvīkṣetātmano bandhaṁ

mokṣaṁ ca jñāna-niṣṭhayā

bandha indriya-vikṣepo

mokṣa eṣāṁ ca saṁyamaḥ

Verso 23

tasmān niyamya ṣaḍ-vargaṁ

mad-bhāvena caren muniḥ

viraktaḥ kṣudra-kāmebhyo

labdhvātmani sukhaṁ mahat

Verso 24

pura-grāma-vrajān sārthān

bhikṣārthaṁ praviśaṁś caret

puṇya-deśa-saric-chaila-

vanāśrama-vatīṁ mahīm

Verso 25

vānaprasthāśrama-padeṣv

abhīkṣṇaṁ bhaikṣyam ācaret

saṁsidhyaty āśv asammohaḥ

śuddha-sattvaḥ śilāndhasā

Verso 26

naitad vastutayā paśyed

dṛśyamānaṁ vinaśyati

asakta-citto viramed

ihāmutra-cikīrṣitāt

Verso 27

yad etad ātmani jagan

mano-vāk-prāṇa-saṁhatam

sarvaṁ māyeti tarkeṇa

sva-sthas tyaktvā na tat smaret

Verso 28

jñāna-niṣṭho virakto vā

mad-bhakto vānapekṣakaḥ

sa-liṅgān āśramāṁs tyaktvā

cared avidhi-gocaraḥ

Verso 29

budho bālaka-vat krīḍet

kuśalo jaḍa-vac caret

vaded unmatta-vad vidvān

go-caryāṁ naigamaś caret

Verso 30

veda-vāda-rato na syān

na pāṣaṇḍī na haitukaḥ

śuṣka-vāda-vivāde na

kañcit pakṣaṁ samāśrayet

Verso 31

nodvijeta janād dhīro

janaṁ codvejayen na tu

ati-vādāṁs titikṣeta

nāvamanyeta kañcana

deham uddiśya paśu-vad

vairaṁ kuryān na kenacit

Verso 32

eka eva paro hy ātmā

bhūteṣv ātmany avasthitaḥ

yathendur uda-pātreṣu

bhūtāny ekātmakāni ca

Verso 33

alabdhvā na viṣīdeta

kāle kāle ’śanaṁ kvacit

labdhvā na hṛṣyed dhṛtimān

ubhayaṁ daiva-tantritam

Verso 34

āhārārthaṁ samīheta

yuktaṁ tat-prāṇa-dhāraṇam

tattvaṁ vimṛśyate tena

tad vijñāya vimucyate

Verso 35

yadṛcchayopapannānnam

adyāc chreṣṭham utāparam

tathā vāsas tathā śayyāṁ

prāptaṁ prāptaṁ bhajen muniḥ

Verso 36

śaucam ācamanaṁ snānaṁ

na tu codanayā caret

anyāṁś ca niyamāñ jñānī

yathāhaṁ līlayeśvaraḥ

Verso 37

na hi tasya vikalpākhyā

yā ca mad-vīkṣayā hatā

ā-dehāntāt kvacit khyātis

tataḥ sampadyate mayā

Verso 38

duḥkhodarkeṣu kāmeṣu

jāta-nirveda ātmavān

ajijñāsita-mad-dharmo

muniṁ gurum upavrajet

Verso 39

tāvat paricared bhaktaḥ

śraddhāvān anasūyakaḥ

yāvad brahma vijānīyān

mām eva gurum ādṛtaḥ

Versos 40-41

yas tv asaṁyata-ṣaḍ-vargaḥ

pracaṇḍendriya-sārathiḥ

jñāna-vairāgya-rahitas

tridaṇḍam upajīvati

surān ātmānam ātma-sthaṁ

nihnute māṁ ca dharma-hā

avipakva-kaṣāyo ’smād

amuṣmāc ca vihīyate

Verso 42

bhikṣor dharmaḥ śamo ’hiṁsā

tapa īkṣā vanaukasaḥ

gṛhiṇo bhūta-rakṣejyā

dvijasyācārya-sevanam

Verso 43

brahmacaryaṁ tapaḥ śaucaṁ

santoṣo bhūta-sauhṛdam

gṛhasthasyāpy ṛtau gantuḥ

sarveṣāṁ mad-upāsanam

Verso 44

iti māṁ yaḥ sva-dharmeṇa

bhajen nityam ananya-bhāk

sarva-bhūteṣu mad-bhāvo

mad-bhaktiṁ vindate dṛḍhām

Verso 45

bhaktyoddhavānapāyinyā

sarva-loka-maheśvaram

sarvotpatty-apyayaṁ brahma

kāraṇaṁ mopayāti saḥ

Verso 46

iti sva-dharma-nirṇikta-

sattvo nirjñāta-mad-gatiḥ

jñāna-vijñāna-sampanno

na cirāt samupaiti mām

Verso 47

varṇāśramavatāṁ dharma

eṣa ācāra-lakṣaṇaḥ

sa eva mad-bhakti-yuto

niḥśreyasa-karaḥ paraḥ

Verso 48

etat te ’bhihitaṁ sādho

bhavān pṛcchati yac ca mām

yathā sva-dharma-saṁyukto

bhakto māṁ samiyāt param