Verso 1

śrī-uddhava uvāca

kriyā-yogaṁ samācakṣva

bhavad-ārādhanaṁ prabho

yasmāt tvāṁ ye yathārcanti

sātvatāḥ sātvatarṣabha

Verso 2

etad vadanti munayo

muhur niḥśreyasaṁ nṛṇām

nārado bhagavān vyāsa

ācāryo ’ṅgirasaḥ sutaḥ

Versos 3-4

niḥsṛtaṁ te mukhāmbhojād

yad āha bhagavān ajaḥ

putrebhyo bhṛgu-mukhyebhyo

devyai ca bhagavān bhavaḥ

etad vai sarva-varṇānām

āśramāṇāṁ ca sammatam

śreyasām uttamaṁ manye

strī-śūdrāṇāṁ ca māna-da

Verso 5

etat kamala-patrākṣa

karma-bandha-vimocanam

bhaktāya cānuraktāya

brūhi viśveśvareśvara

Verso 6

śrī-bhagavān uvāca

na hy anto ’nanta-pārasya

karma-kāṇḍasya coddhava

saṅkṣiptaṁ varṇayiṣyāmi

yathāvad anupūrvaśaḥ

Verso 7

vaidikas tāntriko miśra

iti me tri-vidho makhaḥ

trayāṇām īpsitenaiva

vidhinā māṁ samarcaret

Verso 8

yadā sva-nigamenoktaṁ

dvijatvaṁ prāpya pūruṣaḥ

yathā yajeta māṁ bhaktyā

śraddhayā tan nibodha me

Verso 9

arcāyāṁ sthaṇḍile ’gnau vā

sūrye vāpsu hṛdi dvijaḥ

dravyeṇa bhakti-yukto ’rcet

sva-guruṁ mām amāyayā

Verso 10

pūrvaṁ snānaṁ prakurvīta

dhauta-danto ’ṅga-śuddhaye

ubhayair api ca snānaṁ

mantrair mṛd-grahaṇādinā

Verso 11

sandhyopāstyādi-karmāṇi

vedenācoditāni me

pūjāṁ taiḥ kalpayet samyak-

saṅkalpaḥ karma-pāvanīm

Verso 12

śailī dāru-mayī lauhī

lepyā lekhyā ca saikatī

mano-mayī maṇi-mayī

pratimāṣṭa-vidhā smṛtā

Verso 13

calācaleti dvi-vidhā

pratiṣṭhā jīva-mandiram

udvāsāvāhane na staḥ

sthirāyām uddhavārcane

Verso 14

asthirāyāṁ vikalpaḥ syāt

sthaṇḍile tu bhaved dvayam

snapanaṁ tv avilepyāyām

anyatra parimārjanam

Verso 15

dravyaiḥ prasiddhair mad-yāgaḥ

pratimādiṣv amāyinaḥ

bhaktasya ca yathā-labdhair

hṛdi bhāvena caiva hi

Versos 16-17

snānālaṅkaraṇaṁ preṣṭham

arcāyām eva tūddhava

sthaṇḍile tattva-vinyāso

vahnāv ājya-plutaṁ haviḥ

sūrye cābhyarhaṇaṁ preṣṭhaṁ

salile salilādibhiḥ

śraddhayopāhṛtaṁ preṣṭhaṁ

bhaktena mama vāry api

Verso 18

bhūry apy abhaktopāhṛtaṁ

na me toṣāya kalpate

gandho dhūpaḥ sumanaso

dīpo ’nnādyaṁ ca kiṁ punaḥ

Verso 19

śuciḥ sambhṛta-sambhāraḥ

prāg-darbhaiḥ kalpitāsanaḥ

āsīnaḥ prāg udag vārced

arcāyāṁ tv atha sammukhaḥ

Verso 20

kṛta-nyāsaḥ kṛta-nyāsāṁ

mad-arcāṁ pāṇināmṛjet

kalaśaṁ prokṣaṇīyaṁ ca

yathāvad upasādhayet

Verso 21

tad-adbhir deva-yajanaṁ

dravyāṇy ātmānam eva ca

prokṣya pātrāṇi trīṇy adbhis

tais tair dravyaiś ca sādhayet

Verso 22

pādyārghyācamanīyārthaṁ

trīṇi pātrāṇi deśikaḥ

hṛdā śīrṣṇātha śikhayā

gāyatryā cābhimantrayet

Verso 23

piṇḍe vāyv-agni-saṁśuddhe

hṛt-padma-sthāṁ parāṁ mama

aṇvīṁ jīva-kalāṁ dhyāyen

nādānte siddha-bhāvitām

Verso 24

tayātma-bhūtayā piṇḍe

vyāpte sampūjya tan-mayaḥ

āvāhyārcādiṣu sthāpya

nyastāṅgaṁ māṁ prapūjayet

Versos 25-26

pādyopasparśārhaṇādīn

upacārān prakalpayet

dharmādibhiś ca navabhiḥ

kalpayitvāsanaṁ mama

padmam aṣṭa-dalaṁ tatra

karṇikā-kesarojjvalam

ubhābhyāṁ veda-tantrābhyāṁ

mahyaṁ tūbhaya-siddhaye

Verso 27

sudarśanaṁ pāñcajanyaṁ

gadāsīṣu-dhanur-halān

muṣalaṁ kaustubhaṁ mālāṁ

śrīvatsaṁ cānupūjayet

Verso 28

nandaṁ sunandaṁ garuḍaṁ

pracaṇḍaṁ caṇḍam eva ca

mahābalaṁ balaṁ caiva

kumudaṁ kumudekṣaṇam

Verso 29

durgāṁ vināyakaṁ vyāsaṁ

viṣvaksenaṁ gurūn surān

sve sve sthāne tv abhimukhān

pūjayet prokṣaṇādibhiḥ

Versos 30-31

candanośīra-karpūra-

kuṅkumāguru-vāsitaiḥ

salilaiḥ snāpayen mantrair

nityadā vibhave sati

svarṇa-gharmānuvākena

mahāpuruṣa-vidyayā

pauruṣeṇāpi sūktena

sāmabhī rājanādibhiḥ

Verso 32

vastropavītābharaṇa-

patra-srag-gandha-lepanaiḥ

alaṅkurvīta sa-prema

mad-bhakto māṁ yathocitam

Verso 33

pādyam ācamanīyaṁ ca

gandhaṁ sumanaso ’kṣatān

dhūpa-dīpopahāryāṇi

dadyān me śraddhayārcakaḥ

Verso 34

guḍa-pāyasa-sarpīṁṣi

śaṣkuly-āpūpa-modakān

saṁyāva-dadhi-sūpāṁś ca

naivedyaṁ sati kalpayet

Verso 35

abhyaṅgonmardanādarśa-

danta-dhāvābhiṣecanam

annādya-gīta-nṛtyāni

parvaṇi syur utānv-aham

Verso 36

vidhinā vihite kuṇḍe

mekhalā-garta-vedibhiḥ

agnim ādhāya paritaḥ

samūhet pāṇinoditam

Verso 37

paristīryātha paryukṣed

anvādhāya yathā-vidhi

prokṣaṇyāsādya dravyāṇi

prokṣyāgnau bhāvayeta mām

Versos 38-41

tapta-jāmbūnada-prakhyaṁ

śaṅkha-cakra-gadāmbujaiḥ

lasac-catur-bhujaṁ śāntaṁ

padma-kiñjalka-vāsasam

sphurat-kirīṭa-kaṭaka

kaṭi-sūtra-varāṅgadam

śrīvatsa-vakṣasaṁ bhrājat-

kaustubhaṁ vana-mālinam

dhyāyann abhyarcya dārūṇi

haviṣābhighṛtāni ca

prāsyājya-bhāgāv āghārau

dattvā cājya-plutaṁ haviḥ

juhuyān mūla-mantreṇa

ṣoḍaśarcāvadānataḥ

dharmādibhyo yathā-nyāyaṁ

mantraiḥ sviṣṭi-kṛtaṁ budhaḥ

Verso 42

abhyarcyātha namaskṛtya

pārṣadebhyo baliṁ haret

mūla-mantraṁ japed brahma

smaran nārāyaṇātmakam

Verso 43

dattvācamanam uccheṣaṁ

viṣvaksenāya kalpayet

mukha-vāsaṁ surabhimat

tāmbūlādyam athārhayet

Verso 44

upagāyan gṛṇan nṛtyan

karmāṇy abhinayan mama

mat-kathāḥ śrāvayan śṛṇvan

muhūrtaṁ kṣaṇiko bhavet

Verso 45

stavair uccāvacaiḥ stotraiḥ

paurāṇaiḥ prākṛtair api

stutvā prasīda bhagavann

iti vandeta daṇḍa-vat

Verso 46

śiro mat-pādayoḥ kṛtvā

bāhubhyāṁ ca parasparam

prapannaṁ pāhi mām īśa

bhītaṁ mṛtyu-grahārṇavāt

Verso 47

iti śeṣāṁ mayā dattāṁ

śirasy ādhāya sādaram

udvāsayec ced udvāsyaṁ

jyotir jyotiṣi tat punaḥ

Verso 48

arcādiṣu yadā yatra

śraddhā māṁ tatra cārcayet

sarva-bhūteṣv ātmani ca

sarvātmāham avasthitaḥ

Verso 49

evaṁ kriyā-yoga-pathaiḥ

pumān vaidika-tāntrikaiḥ

arcann ubhayataḥ siddhiṁ

matto vindaty abhīpsitām

Verso 50

mad-arcāṁ sampratiṣṭhāpya

mandiraṁ kārayed dṛḍham

puṣpodyānāni ramyāṇi

pūjā-yātrotsavāśritān

Verso 51

pūjādīnāṁ pravāhārthaṁ

mahā-parvasv athānv-aham

kṣetrāpaṇa-pura-grāmān

dattvā mat-sārṣṭitām iyāt

Verso 52

pratiṣṭhayā sārvabhaumaṁ

sadmanā bhuvana-trayam

pūjādinā brahma-lokaṁ

tribhir mat-sāmyatām iyāt

Verso 53

mām eva nairapekṣyeṇa

bhakti-yogena vindati

bhakti-yogaṁ sa labhata

evaṁ yaḥ pūjayeta mām

Verso 54

yaḥ sva-dattāṁ parair dattāṁ

hareta sura-viprayoḥ

vṛttiṁ sa jāyate viḍ-bhug

varṣāṇām ayutāyutam

Verso 55

kartuś ca sārather hetor

anumoditur eva ca

karmaṇāṁ bhāginaḥ pretya

bhūyo bhūyasi tat-phalam